वीरगंज । निजी तथा आवासीय विद्यालय सङ्गठन (प्याब्सन) वीरगंजको आयोजनामा सञ्चालन भइरहेको दोस्रो संस्करणको प्याब्सन टी–१० गर्ल्स एन्ड जुनियर बोयज क्रिकेट प्रतियोगिता अन्तर्गत सोमबार भएको बोयजतर्फको सेमी–फाइनल खेलमा पर्साको ग्रामीण भेगस्थित ब्लु हेभेन एकेडेमी स्कुलले उत्कृष्ट प्रदर्शन गर्दै शानदार जित हासिल गरेको छ।
खेलमा टस जितेर पहिले ब्याटिङ गरेको ब्लु हेभेन एकेडेमीले निर्धारित ८ ओभरमा ६१ रन बनाएको थियो। टोलीका लागि पृथ्वी पटेलले महत्वपूर्ण २२ रन जोड्दै टिमको स्कोर मजबुत बनाए।
६२ रनको लक्ष्य पछ्याउँदै मैदानमा उत्रिएको वीरगंजको लिटल फलावर सेकेन्डरी स्कुल ब्लु हेभेन एकेडेमीको कडा बलिङ आक्रमण अगाडि टिक्न सकेन । विपक्षी टोली ७ ओभरमै मात्र १३ रनमा अलआउट हुँदा ब्लु हेभेन एकेडेमीले ४८ रनको फराकिलो जित दर्ता गर्यो।
बलिङतर्फ पृथ्वी पटेलले असाधारण प्रदर्शन गर्दै २ ओभरमा मात्र ३ रन खर्चेर ४ विकेट लिए। ब्याटिङ र बलिङ दुवैमा उत्कृष्ट योगदान पुर्याएका कारण उनी म्यान अफ द म्याच घोषित भए।
यस ऐतिहासिक जितका अवसरमा ब्लु हेभेन एकेडेमीका सम्पूर्ण खेलाडी, प्रशिक्षक तथा व्यवस्थापन टोलीलाई विद्यालयका प्रिन्सिपल सुदिल कुमार पटेलले हार्दिक बधाई दिँदै आगामी खेलहरूका लागि सफलताको शुभकामना व्यक्त गरेका छन्।
