वीरगंज । निजी तथा आवासीय विद्यालय सङ्गठन (प्याब्सन) वीरगञ्जको आयोजनामा सञ्चालन भइरहेको दोस्रो संस्करणको प्याब्सन टी–१० गर्ल्स एन्ड जुनियर बोयज क्रिकेट प्रतियोगिता अन्तर्गत पुस १३ गते (बारौँ दिन) छ वटा प्रतिस्पर्धात्मक तथा रोमाञ्चक खेलहरू सम्पन्न भएका छन् । आदर्शनगरस्थित क्रिकेट मैदानमा सम्पन्न खेलहरूमा छात्रा तथा जुनियर छात्रतर्फका विभिन्न विद्यालय टोलीहरूले उत्कृष्ट खेल कौशल प्रदर्शन गरेका छन् ।
बारौँ दिनको पहिलो खेल (जुनियर छात्र) गोल्डेन फ्युचर सेकेन्डरी स्कुल र लिटल फ्लावर सेकेन्डरी स्कुलबीच भएको थियो । खेलमा लिटल फ्लावर सेकेन्डरी स्कुलले ७ विकेटको जित हात पार्दै विजयी भयो । उक्त खेलका प्लेयर अफ द म्याच सुशांक गुप्ता घोषित भए ।
दोस्रो खेल (छात्रा) गौतम सेकेन्डरी स्कुल र साउथ जोन सेकेन्डरी स्कुलबीच सम्पन्न भयो । साउथ जोन सेकेन्डरी स्कुलले सशक्त प्रदर्शन गर्दै १० विकेटको फराकिलो जित दर्ता गर्यो । यस खेलकी प्लेयर अफ द म्याच शिवानी साह घोषित भइन् ।
तेस्रो खेल (जुनियर छात्र) एस.आर. ग्यालेक्सी एकेडेमी र गोल्डेन फ्युचर सेकेन्डरी स्कुलबीच प्रतिस्पर्धात्मक रुपमा सम्पन्न भयो । खेलमा एस.आर. ग्यालेक्सी एकेडेमीले १५ रनको जित निकाल्न सफल भयो । उत्कृष्ट प्रदर्शन गरेका राजन साह प्लेयर अफ द म्याच बने ।
चौथो खेल (छात्रा) एस.आर. ग्यालेक्सी एकेडेमी र बेकन सेकेन्डरी स्कुलबीच खेलिएको थियो । उक्त खेलमा एस.आर. ग्यालेक्सी एकेडेमीले ८ विकेटको सहज जित हात पार्यो । यस खेलकी प्लेयर अफ द म्याच दीक्षा गिरी घोषित भइन् ।
पाँचौँ खेल (जुनियर छात्र) सुर्योदय सेकेन्डरी स्कुल र ज्ञान वाटिका स्कुलबीच सम्पन्न भयो । उत्कृष्ट टोलीगत प्रदर्शन गर्दै सुर्योदय सेकेन्डरी स्कुलले ७ विकेटको जित दर्ता गर्यो । यस खेलका प्लेयर अफ द म्याच साहिद देवान घोषित भए ।
बारौँ दिनको अन्तिम खेल (छात्रा) लिटल फ्लावर सेकेन्डरी स्कुल र एस.आर. ग्यालेक्सी एकेडेमीबीच कडा प्रतिस्पर्धाका बीच सम्पन्न भयो । खेलमा लिटल फ्लावर सेकेन्डरी स्कुलले १२ रनको रोमाञ्चक जित हात पार्यो । यस खेलकी प्लेयर अफ द म्याच अर्चना ठाकुर घोषित भइन् ।
आयोजक प्याब्सन वीरगञ्जका अनुसार प्रतियोगिताले विद्यालयस्तरका छात्रा तथा जुनियर छात्र खेलाडीहरूलाई आफ्नो प्रतिभा प्रस्तुत गर्ने उत्कृष्ट मञ्च प्रदान गरेको छ । दर्शकको उत्साहपूर्ण उपस्थिती र विद्यालयहरूको सक्रिय सहभागिताले प्रतियोगिता झन् रोचक बन्दै गएको आयोजकले जनाएको छ ।
