कलैया । इलाका प्रहरी कार्यालय कोल्हवी बाराले लागू औषध ओसारपसारमा संलग्न रहेको आरोपमा ३ जनालाई नियन्त्रणमा लिएको छ ।
अफिम जस्तो देखिने ४६० ग्राम लागू औषधसहित रौतहट जिल्लाको चन्द्रपुर नगरपालिका वडा नम्बर १० निवासी ३२ वर्षीय राजेश साह, २९ वर्षीय नागेन्द्र साह र २२ वर्षीय ज्ञानेन्द्र रामलाई पक्राउ गरिएकाे जिल्ला प्रहरी कार्यालय बाराका निमित्त सूचना अधिकारी प्रहरी निरिक्षक सुरेश राज भट्टले जानकारी दिए ।
विशेष सूचनाको आधारमा इलाका प्रहरी कार्यालय कोल्हवी बारा र लागू औषध नियन्त्रण ब्यूरो शाखा कार्यालय वीरगंज, पर्साबाट संयुक्त रूपमा खटिएको टोलीले शनिबार दिउँसो ३:३० उनीहरुलाई नियन्त्रणमा लिएकाे हाे । कोल्हवी नगरपालिका वडा नम्बर ०१ बजारस्थित तामागढीबाट श्रीपुरतर्फ आउँदै गरेको प्र.२–०३–००५ प ६३१२ नम्बरको टीभीएस मोटरसाइकललाई शंकास्पद देखिएपछि रोकी जाँच गर्दा मोटरसाइकलमा सवार व्यक्तिहरूको साथबाट लागू औषध अफिम जस्तो देखिने पदार्थ बरामद भएकाे प्रहरीले जनाएकाे छ ।
प्रहरीका अनुसार चेक जाँचका क्रममा राजेश साहको साथबाट लुकाइछिपाइ राखिएको ४६० ग्राम अफिम जस्तो देखिने पदार्थ फेला परेको हाे । लागू औषध ओसारपसार कार्यमा संलग्न रहेको आरोपमा ती व्यक्तिहरू र प्रयोग भएको मोटरसाइकलसमेत नियन्त्रणमा लिई थप अनुसन्धान भइरहेको इलाका प्रहरी कार्यालय काेल्हवीका प्रमुख प्रहरी निरिक्षक रन्जन मिश्रले वताए ।
