वीरगंज । पछिल्लो केही दिनदेखि बढेको कठ्याङ्ग्रिँदो चिसो र शीतलहरका कारण वीरगंजको जनजीवन कष्टकर बनेको छ । चिसोका कारण स्थानीयवासीले भोगिरहेका समस्यालाई मध्यनजर गर्दै वीरगंज महानगरपालिका वडा नम्बर १० का वडाध्यक्ष सुशील कुमार कानुले वडावासीका लागि राहतस्वरूप आगो ताप्ने व्यवस्था मिलाएका छन् ।
वडाध्यक्ष कानुको नेतृत्वमा वडाभित्र दुई दर्जनभन्दा बढी स्थानमा दाउरा बालेर आगो ताप्ने सुविधा उपलब्ध गराइएको छ । आइतबारदेखि सुरु गरिएको यो पहल शीतलहरको प्रभाव कम नहुँदासम्म निरन्तर सञ्चालन हुने वडाध्यक्ष कानुले जानकारी दिए ।
विशेष गरी बाहिर बसेर काम गर्नुपर्ने मजदुर, रिक्सा चालक, सुरक्षाकर्मी तथा सर्वसाधारणलाई लक्षित गरी यो व्यवस्था गरिएको उनले बताए ।
उनका अनुसार ठाकुरराम क्याम्पस अगाडि, सत्या हल अगाडि, घडिअर्वा चोक, बाबा मठिया चोक, बनारसी चोक, वर्णवाल चोक, अशोक वाटिका चोक, रानीघाट चोक, घडिअर्वा गाउँको इनार अगाडि, प्रहरी चौकी अगाडि, कुमारी माई मन्दिर अगाडि, कर कार्यालय अगाडि, होली ल्यान्ड स्कुल अगाडि लगायत वडाका विभिन्न स्थानमा आगो ताप्ने व्यवस्था गरिएको छ ।
“चिसोका कारण वडावासीहरू निकै पीडित छन् । उनीहरूको दैनिक जीवन सहज बनाउन र शीतलहरको असर कम गर्न यो पहल गरिएको हो,” वडाध्यक्ष कानुले भने । स्थानीयवासीहरूले वडाध्यक्षको यो कदमलाई समयसापेक्ष र मानवीय भन्दै स्वागत गरेका छन् ।
