सेढवा । ठोरी गाउँपालिका वडा नं. ५ स्थित बाघमोर्चामाई मन्दिर परिसरमा आइतबार श्रम संस्कृति पार्टी पर्सा जिल्ला भेला तथा जिल्ला समिति गठनसहित पार्टी प्रवेश कार्यक्रम भव्य रूपमा सम्पन्न भएको छ ।
“हाम्रो धर्ती, हाम्रो आकाश हाम्रै परिवेश। श्रम गरी सबै मिलि बनाऔं यो देश” भन्ने मूल नाराका साथ आयोजित कार्यक्रममा धरान उपमहानगरपालिकाका नगरप्रमुख तथा श्रम संस्कृति पार्टीका केन्द्रीय अध्यक्ष हर्क साम्पाङ प्रमुख अतिथिका रूपमा सहभागी रहनुभएको थियो ।
दिउँसो करिब २ बजेदेखि सुरु भएको कार्यक्रम साँझ ४ बजेसम्म चलेको थियो । कार्यक्रममा करिब २०० देखि २१० जना स्थानीय नागरिकहरूको सहभागिता रहेको थियो ।
कार्यक्रममा श्रम संस्कृति पार्टी पर्सा जिल्ला संयोजक प्रताप पाख्रिन, केन्द्रीय सदस्यहरू केन्द्र दिवस राई, शान्ति पाख्रिन, मन्दिरा मोक्तान, महेन्द्र पुन लगायतको उपस्थिति रहेको थियो । कार्यक्रमको औपचारिक उद्घाटन श्रम संस्कृति पार्टी मधेश प्रदेशका सह–संयोजक छोटेलाल पठानको मन्तव्यबाट गरिएको थियो ।
कार्यक्रमलाई सम्बोधन गर्दै प्रमुख अतिथि हर्क साम्पाङले पुराना राजनीतिक नेतृत्वहरूले अपेक्षित काम गर्न नसकेकै कारण देश विकास हुन नसकेको धारणा व्यक्त गर्नुभयो । उहाँले राजनीतिक नेतृत्वहरू भ्रष्टाचारमा डुबेको आरोप लगाउँदै विदेशमा रहेका नेपालीहरूबाट श्रम संस्कृति पार्टीलाई उल्लेख्य सहयोग प्राप्त भइरहेको जानकारी दिनुभयो ।
साथै, उहाँले प्रहरीमाथि अत्यधिक राजनीतिक दबाब रहेको उल्लेख गर्दै देशको अस्तित्व भूगोलसँग प्रत्यक्ष रूपमा जोडिएको हुनाले सीमा सुरक्षा अत्यन्तै संवेदनशील र महत्वपूर्ण विषय भएको बताउनुभयो ।
कार्यक्रमको अन्त्यतिर नेपाली कांग्रेसका सदस्य भिमचन्द्र गुरुङले प्रमुख अतिथि हर्क साम्पाङसँग अनौपचारिक भेटवार्ता गर्दै भोलि नवलपुरमा सुकुम्बासीहरूको हक–हितका लागि आयोजना हुने कार्यक्रममा उपस्थित हुन आग्रह गर्नुभएको थियो ।
