वीरगंज । जिउ मास्ने बेच्ने सम्बन्धि कसूर मुद्दामा २० वर्षदेखि फरार रहेका एक प्रतिवादीलाई पर्साबाट पक्राउ गरिएको छ ।
जिल्ला प्रहरी कार्यालय पर्साका अनुसार मिति २०६२ साल चैत १७ गते साँझ करिब ८ बजे दर्ता भएको मुद्दामा संलग्न रहेका वीरगंज महानगरपालिका–१९ बस्ने ४५ वर्षीय सुरेश प्रसाद कलवारलाई विशेष सूचनाको आधारमा आइतबार साँझ ४:४५ बजे प्रहरी टोलीले वीरगंज महानगरपालिका–९ स्थित सडकखण्डबाट नियन्त्रणमा लिएको हो ।
उनी विरुद्ध विन्दवासिनी गाउँपालिका–६ बस्ने बृजेश प्रसाद कलवारको जाहेरीका आधारमा नेपाल सरकार विरुद्धको नाममा मुद्दा दर्ता भएको थियो । फरार अभियुक्त घटनापछि लामो समयदेखि लुकेर बस्दै आएका थिए ।
पक्राउ परेका कलवारलाई आवश्यक अनुसन्धान अघि बढाइरहेको जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतले जानकारी दिए ।
