वीरगंज । बाराको कलैयास्थित यातायात कार्यालयमा बुधबार साँझ कार्यालय प्रमुख अबिन्द्र दास र खरिदार सत्यनारायण साहबीच कुटाकुट भएको छ। साँझ करिब साढे पाँच बजेतिर कार्यालयमै दुवै जनाबीच कुटाकुट हुँदा दुबैजना घाइते भएका छन्।
कुटाकुटबाट खरिदार साहको अनुहारमा चोट लागेर सुन्निएको तथा कार्यालय प्रमुख दासको अनुहारमा पनि घाउ लागेको प्रहरीले जनाएको छ। घटनापछि घटना संलग्न पांच जनालाई जिल्ला प्रहरी कार्यालय बाराको टोलीले नियन्त्रणमा लिएको थियो।
कार्यालय प्रमुख दासको सरुवा भइसकेको र उनीसँग हाजिरका विषयमा विवाद चर्किँदै हात हालाहालसम्म पुगेको पुष्टि यातायात कार्यालय कलैयाका सूचना अधिकारी जीवन पौडेलले गरेका छन्।
खरिदार साहले सरुवा भएर आएका नयाँ कार्यालय प्रमुख सरोज यादवलाई हाजिर गराएर दासलाई रवाना हुने प्रक्रिया अगाडि बढाउन सुझाएपछि विवाद सुरु भएको थियो। सो क्रममा दासका चालकले साहमाथि हात हालेपछि कुटाकुट भएको बताइएको छ।
घटनामा संलग्न सबैलाई प्रहरीले नियन्त्रणमा लिएर छलफल गरेपछि कार्यालयकै स्तरमा विवाद समाधान गर्ने सहमति भएको र शुक्रबार बस्ने बैठकमा निष्कर्ष निकाल्ने सहमतिले पक्राउ परेकाहरुलाई छाेडेकाे थियाे ।
