वीरगंज । प्रेस काउन्सिल नेपालका टोलीले बुधबार बारामा अनुगमन गरेको छ । टोलीमा मुख्य अधिकृत झविन्द्र भुसाल तथा गुनासो सुन्ने अधिकारी एवम् उप–प्रशासकीय अधिकृत राधेश्याम अधिकारी रहेका थिए।
टोलीले जिल्ला हुलाक कार्यालय, स्टेसनरी तथा विभिन्न पत्रपत्रिकाका कार्यालयमा निरीक्षण गर्दै प्रकाशन, विज्ञापन बोर्ड सूचना, अभिलेख र साप्ताहिक पत्रपत्रिकाको अवस्था जाँच गरेको छ । बाराबाट प्रकाशित हुने स्थानीय पत्रपत्रिकाको प्रधान कार्यालयमा पनि टोलीले अनुगमन गरेको छ।
मुख्य अधिकृत भुसालले अनुगमनको उद्देश्य वर्तमान बजारमा साप्ताहिक पत्रपत्रिकाहरू कम देखिने, नगर्ने वा नभेटिने विषयमा प्राप्त गुनासोको समाधान गर्नु रहेको बताए । अनुगमनका क्रममा स्थानीय र सरोकारवालाहरूले दैनिक पत्रिकाहरू केही देखिए पनि साप्ताहिक पत्रिकाहरू पर्याप्त रूपमा उपलब्ध नभएको बताएका छन्।
टोलीले अधिकांश पत्रिकाले प्रिन्टलाइनमा आफ्नो कार्यालयको ठेगाना उल्लेख नगरेको पाइएपछि तत्काल अर्को अंकदेखि ठेगाना स्पष्ट उल्लेख गरी प्रकाशन गर्न सुझाव दिएको छ।
विशेष गरि, बाराका पत्रिकाहरूले कतिपय विज्ञापन प्रकाशनमा गैर-पेशागत आचारण गरेको र त्यस सम्बन्धी उजूरी अख्तियार दुरुपयोग अनुसन्धान आयोगमा धेरै पर्ने गरेको पाइएपछि त्यस विषयमा गम्भीर बन्न प्रेस काउन्सिलले आग्रह गरेको छ।
अनुगमनका क्रममा टोलीले नेपाल पत्रकार महासंघका अध्यक्ष रमेश सुवेदी र जिल्ला हुलाक कार्यालय बाराका हुलाक अधिकृत दीपक कुमार पटेलसँग समेत छलफल गरेको थियो।
