वीरगंज । पर्साकाे जगरनाथपुर गाउँपालिकामा कृषि उत्पादन वृद्धि तथा किसानलाई आधुनिक खेतीतर्फ उन्मुख गराउने उद्देश्यसहित ५० प्रतिशत अनुदानमा उन्नत जातको गहुँ बीउ वितरण गरिएको छ।
उक्त कार्यक्रमले किसानको लागत घटाई उत्पादनमूलक तथा परिणाममुखी खेतीलाई प्रवर्धन गर्ने लक्ष्य राखिएको गाउँपालिकाले जनाएको छ । समयमै गुणस्तरीय बिउ उपलब्ध गराउनु नै समृद्ध कृषि र समृद्ध गाउँ निर्माणको आधार हुने भएकाले कार्यक्रम प्रभावकारी रहेको सरोकारवालाहरूले बताएका छन् ।
गाउँपालिकाका अध्यक्ष श्रीकान्त प्रसाद यादवले, “किसान दाजुभाइबहिनीहरूलाई सशक्त बनाउनु हाम्रो प्राथमिकता हो । हामी सहजीकरण, प्रविधिक सहयोग र कृषि अनुदानमार्फत किसानको आय वृद्धि तथा आत्मनिर्भरता अभिवृद्धिको दिशामा अघि बढिरहेका छौँ,” भन्दै सबैलाई सहयोग र सहभागिताका लागि धन्यवाद व्यक्त गरेका छन् ।
