वीरगंज । पर्सा प्रहरीले विशेष सूचनाका आधारमा ठूलो परिमाणको गाँजासहित एक कार र दुई जनालाई पक्राउ गरेको छ । साेमबार दिउँसो करीब ३ बजे पटेर्वासुगौली गाउँपालिका–२, रंगपुर क्षेत्रमा लागुऔषध ओसारपसार भइरहेको जानकारी पाएपछि खटिएको प्रहरी टोलीले चेकजाँचका क्रममा एक कारबाट गाँजा बरामद गरेको हो ।
मनवाबाट रंगपुरतर्फ जाँदै गरेको बिएबि ९३९८ नम्बरको मारुती सुजुकी कारलाई रोकेर खानतलासी गर्दा प्लास्टिकले लुकाइ–छिपाइ राखिएको १० पोकामा १०४ केजी ३२५ ग्राम गाँजा जस्तो देखिने पदार्थ फेला परेको जिल्ला प्रहरी कार्यालय पर्साले जनाएको छ ।
प्रहरीले उक्त कारसँगै दुई जनालाई नियन्त्रणमा लिएको छ । पक्राउ पर्नेहरूमा मकवानपुर भिमफेदी गाउँपालिका–८ बस्ने ३२ वर्षीय भिम स्याङ्तान (चालक) र मकवानपुरगढी गाउँपालिका–१ बस्ने ३८ वर्षीय कुमार स्याङ्तान रहेका छन् ।
उनीहरूलाई लागुऔषध सम्बन्धी कसूरमा नियन्त्रणमा राखी थप अनुसन्धान भइरहेको जिल्ला प्रहरी कार्यालय पर्साका प्रवक्ता तथा प्रहरी नायब उपरीक्षक राजु कार्कीले जानकारी दिए ।
