वीरगंज । जिल्ला प्रहरी कार्यालय पर्साले स्रोत नखुलेको १० लाख रुपैयाँ बराबरको हुण्डी रकमसहित एक भारतीय नागरिकलाई पक्राउ गरेको छ। विशेष सूचनाको आधारमा खटिएको प्रहरी चेकिङ टोलीले शुक्रबार बिहान ९ बजे वीरगंज महानगरपालिका–१६, रजत जयन्तीचोक नजिक चेकजाँच गर्ने क्रममा अवैध रकम बरामद गरेको हो।
मधेश प्रदेश ०३–०२५ प ९८०७ नम्बरको मोटरसाइकलमा सवार भारत बिहार, मोतीहारी जिल्ला रक्सौल–१ का ५३ वर्षीय सुरेन्द्र साहलाई चेकजाँचका लागि रोकेपछि मोटरसाइकलको बायाँतर्फको एयर फिल्टरभित्र लुकाइ–छिपाइ राखिएको ठूलो परिमाणको रकम फेला परेको जिल्ला प्रहरी कार्यालयका प्रवक्ता प्रहरी नायब उपरीक्षक राजु कार्कीले जानकारी दिए।
साहको साथबाट १००० दरका ७०० थान बराबर ७ लाख रुपैयाँ र ५०० दरका ६०० थान बराबर ३ लाख रुपैयाँ, गरी कुल १० लाख रुपैयाँ प्रहरीले बरामद गरेको छ। रकमसहित प्रयोग गरिएको मोटरसाइकल पनि नियन्त्रणमा लिइएको प्रहरीले जनाएको छ।
अवैध हुण्डी कारोबार तथा सीमा क्षेत्र हुँदै हुने गैरकानुनी रकम ओसार–पसार नियन्त्रणमा कडाइ गरिएको पर्सा प्रहरीले बताउँदै पक्राउ परेका साहमाथि थप अनुसन्धान भइरहेको जनाएको छ।
