वीरगंज । जनमत पार्टी पर्साले जिल्लाका विभिन्न गाउँपालिका, टोल र वडाहरूमा जेन्जी जनमत संघ गठन अभियानलाई तीव्रता दिएको छ। साथै, पार्टीले वडा स्तरीय जेन्जी मतदाता दर्ता अभियान पनि सक्रिय रूपमा सञ्चालन गरिरहेको जनाएको छ।
जनमत युवा दस्ताका जिल्ला अध्यक्ष मनोज साहका अनुसार हालसम्म वीरगंज महानगरका ६ वटा वडाहरू र ग्रामीण पालिकाका ७ वटा वडाहरूमा जेन्जी जनमत संघ गठन भइसकेको छ। उनले भने, “कार्तिक महिनाभित्रै सबै वडाहरूमा जेन्जी जनमत संघ र युवा दस्ता गठन गरी प्रशिक्षण कार्यक्रम सञ्चालन गर्ने लक्ष्य राखिएको छ।”
त्यसैगरी, जेन्जी मतदाता दर्ता अभियान पर्साको वीरगंज महानगरसहित सात वटा स्थानीय तहमा जारी रहेको जनमत पार्टी पर्साका जिल्ला अध्यक्ष ओमप्रकाश सर्राफले बताएका छन्।
पार्टीका प्रदेश सदस्य बृजेश्वर चौधरीका अनुसार जगरनाथपुर गाउँपालिका सहित अन्य ग्रामीण पालिकाहरूमा मतदाता दर्ता अभियानमा युवाहरूको उत्साहजनक सहभागिता देखिएको छ।
जनमत पार्टीले जेन्जी पुस्तालाई संगठनमा जोड्दै राजनीतिक सचेतना र सशक्तिकरणतर्फ अग्रसर गराउने उद्देश्यले अभियान सञ्चालन गरिरहेको जनाएको छ।
