वीरगंज । वीरगंज महानगरपालिका वडा नं. ९ स्थित बिपिएस प्लस २ कलेजमा शुक्रबार विशेष दन्त परीक्षण शिविर सम्पन्न छ । एभरेष्ट दन्त सेवा केन्द्र प्रा.लि.को प्राविधिक सहयोगमा सम्पन्न उक्त कार्यक्रममा कक्षा ११ र १२ मा अध्ययनरत करिब २०० विद्यार्थीको दन्त स्वास्थ्य परीक्षण गरिएको हो ।
डा. मनोज कुमार उपाध्याय, डा. पूजा सर्राफ र डा. चन्द्रकान्त पासवान नेतृत्वको चिकित्सक टोलीले परीक्षणका क्रममा ८० जना विद्यार्थीमा गिजा सुन्निने, दाँतबाट रगत आउने, र किराले खाएको जस्ता समस्या देखिएको बताएका छन् । समस्याग्रस्त विद्यार्थीलाई थप उपचारका लागि क्लिनिकमा बोलाइएको छ भने, उनीहरूलाई २५ प्रतिशत छुट प्रदान गरिने जानकारी पनि दिइएको छ ।
कार्यक्रमको उद्देश्य विद्यार्थीहरूमा दन्त स्वास्थ्यप्रति चेतना अभिवृद्धि गर्नु रहेको बताउँदै चिकित्सक टोलीले यस्तो जनचेतनामूलक प्रयासलाई निरन्तरता दिनुपर्ने आवश्यकता औंल्याएका छन्।
कार्यक्रमको समापनमा कलेजका डाइरेक्टर दीपक पटेलले धन्यवाद ज्ञापन गर्दै बालबालिकाको समग्र स्वास्थ्यमा दन्त स्वास्थ्यले महत्वपूर्ण भूमिका खेल्ने उल्लेख गरे । साथै, उनले यस्ता स्वास्थ्यसम्बन्धी कार्यक्रमलाई आगामी दिनहरूमा पनि निरन्तरता दिने प्रतिबद्धता व्यक्त गरे।
कार्यक्रममा डाइरेक्टर पटेलसहित कलेजका सन्दीप कुशवाहा, चिकित्सक टोली, शिक्षक-शिक्षिका तथा विद्यार्थीहरूको उल्लेखनीय उपस्थिति रहेको थियो।
