वीरगंज । रोटरी क्लब बीरगंज र माहेश्वरी समाज बीरगंजको संयुक्त पहलमा पर्सा जिल्लाकी एक अपांग महिलालाई निःशुल्क कृत्रिम खुट्टा (तल्लो अप्राकृतिक खुट्टा) प्रदान गरिएको छ।
उक्त सहयोग कार्यक्रम माहेश्वरी समाज बीरगंजका अध्यक्ष प्रकाश बाहेतीको आर्थिक योगदानमा, रोटरी महावीर जयपुर लिम्ब रिहाबिलिटेशन सेन्टर मार्फत सम्पन्न भएको हो।
कार्यक्रमका सह–आयोजक तथा स्थानीय संयोजकको रूपमा रोटरी क्लब बीरगंजले सक्रिय भूमिका निभाएको थियो । क्लबका अध्यक्ष रोटेरियन गोपाल खेतानले अपांगता भएका नागरिकहरूको जीवनमा आशा र आत्मनिर्भरता पुनःस्थापित गर्ने उद्देश्यले अभियान सञ्चालन गरिएको जानकारी दिए । उनले रोटरी क्लब समाजसेवामा सदैव अग्रसर रहँदै आएको र आगामी दिनहरूमा पनि यो अभियानलाई अझ व्यापक रूपमा विस्तार गर्ने लक्ष्य रहेको बताए।
माहेश्वरी समाज बीरगंजले सामाजिक उत्तरदायित्व अन्तर्गत गरिरहेको यस्तो कार्यले अपांग व्यक्तिहरूको जीवनस्तरमा सकारात्मक परिवर्तन ल्याउने विश्वास व्यक्त गरिएको छ। कार्यक्रममा समाजका पदाधिकारी तथा सदस्यहरूको उल्लेखनीय उपस्थिति रहेको थियो।
रोटरी क्लब बीरगंजद्वारा सञ्चालित यस कृत्रिम खुट्टा वितरण अभियानमार्फत हालसम्म सयौं अपांग व्यक्तिहरू लाभान्वित भइसकेका छन्। विज्ञहरूका अनुसार एकवटा कृत्रिम खुट्टा प्रत्यारोपणमा औसत रूपमा १६ हजार ५ सय बराबरको खर्च लाग्ने जानकारी सर्वसाधारणलाई दिइएको छ ।
क्लबका सचिव रोटेरियन राकेश मिश्राले अपांगता भएका व्यक्तिहरूको जीवनमा आशाको उज्यालो फैलाउने यो अभियानले सामाजिक समावेशीता, आत्मसम्मान र मानव अधिकारको संरक्षणमा सहयोग पुर्याउने अपेक्षा व्यक्त गरे ।
