वीरगंज । वीरगंजबाट भारी मात्रामा लागुऔषध गाँजासहित ७ जना पक्राउ परेका छन् । पर्सा प्रहरीले ट्रकमा लोड गरेर राखिएको १ सय ५ किलो गाँजासहित ७ जना पक्राउ परेका हो ।
लागुऔषध गाँजा राखिएको विशेष सूचनाको आधारमा लागुऔषध नियन्त्रण ब्युरोबाट खटिएको प्रहरी टोलीले लालपर्सा गाउँमा रोकी राखेको ना ४ ख ६५२५ नम्बरको ट्रकलाई चेकजाँच गर्दा ट्रकभित्र लुकाई छिपाई राखेको अवस्थामा १ सय त किलो गाँजा बरामद गरिएको जिल्ला प्रहरी कार्यालय पर्साले जनाएको छ ।
ट्रक चेकजाँच गर्दा कालो त्रिपालले छोपी राखेको अवस्थामा गाँजाको चिप्पड बरामद गरिएको लागुऔषध नियन्त्रण ब्युरोका प्रवक्ता कृष्णकुमार महतले जानकारी दिए । उनले सबै गाँजा विभिन्न रंगका प्लास्टिकले बेरेर ट्रकभित्र राखिएको बताए ।
गाँजासहित पक्राउ पर्ने ट्रक चालक मकवानपुर जिल्लाको हेटौंडा उपमहानगरपालिका वडा नम्बर १९ निवासी लक्ष्मण सिटौला, २४ वर्षीय विजय तामाङ, १८ वर्षीय प्रभात तामाङ, मकवानपुर जिल्लाको कैलाश गाउँपालिका वडा नम्बर १० निवासी २६ वर्षीय रामलाल गोले, धादिङ जिल्लाको रोराङ गाउँपालिका वडा नम्बर १ निवासी ३७ वर्षीय निरज लामा, चितवन जिल्लाको राप्ति नगरपालिका वडा नम्बर २ निवासी ५० वर्षीय रानुलाल तामाङ र पर्साका सखुवा प्रसौनी गाउँपालिका वडा नम्बर ३ निवासी ५१ वर्षीय मियाव आलम रहेका छन् ।
पक्राउ परेका सातै जनाविरुद्ध थप अनुसन्धान थालिएको पर्सा प्रहरीको जनाएको छ ।
