वीरगंज । लैङ्गिक हिंसा न्यूनिकरण एंवम पिडि़त सहायतामा एकिकृत प्रयासको अपरिहार्यता सम्बन्धी अन्तरक्रिया कार्यक्रम शनिबार वीरगंजमा सम्पन्न भएको छ ।
वीरगंजस्थित भिस्वा होटलमा भएको कार्यक्रमलाई सम्बोधन गर्दै प्रदेश नं. २ का मख्यमन्त्री लालबाबु राउत गद्दीले लैङ्गिक हिंसाको सवालमा महिला बढी पीडित भए पनि पुरुषहरु पनि पीडित रहेको बताएका छन् ।
सबै दोष पुरुषमा मत्रै नभएर महिलामा पनि हुने गरेको उनको भनाई छ । बैदेशिक रोजगारका कारण पुरुषहरु पनि पिडित भएको मुख्यमन्त्री राउतको उनले बताए ।
यसको न्यूनिकरणको लागि शिक्षामा जोड नदिएसम्म परिवर्तन ल्याउन नसकिन बताउँदै मुख्यमन्त्री गद्दीले शिक्षाको अपरिहार्यता औल्याए ।
उनले भने, ‘‘शिक्षाको साथसाथै अर्थमा पहुँच हुन पनि जरुरी छ । अर्थमा पहुँच नभएसम्म महिला हिंसा न्यूनिकरण बारे सोच्नु एउटा परिकल्पना मात्र हुन्छ ।’’
हुन त अशिक्षित समाजमा मात्रै होइन शिक्षित समाजमा पनि हिंसाको घटना हुने गरेकोले महिला हिंसा न्युनिकरण गर्न शिक्षाको साथसाथै चेतनाको जरुरी पनि रहेको बताए ।
कार्यक्रमका प्रमुख अतिथिसमेत रहेका मुख्यमन्त्री गद्दीले केही समय मै प्रत्येक प्रहरी युनियटमा ५० प्रतिशत महिला प्रहरी हुने दाबी गरे । त्यसको लागी प्रदेश सरकारले कामकारवाही पनि अगाडी बढाईसकेको उनले जानकारी गराए ।
प्रदेश नं. २ को सवालमा सामुहिक रुपमा यसलाई रोकन प्रयास गरियो भने रोकन सकिने बताउँदै उनले महिला हिंसा न्युनिकरणको लागि प्रदेश स्तरमा एउटा छुट्टै नीति र ऐन बनाएर अगाडि बढनु पर्ने र त्यसलाई हेर्न एउटा अलगै निकायको आवश्यकता रहेको धारणा राखे ।
प्रतिनिधि सभा सदस्य प्रदिप यादवले हाम्रो समाजमा महिला हिंसाको प्रमुख कारण दाईजो प्रथा नै रहेको बताए । यसका साथै बालबिबाह पनि समस्याको रुपमा रहेको उनले बताए । यसको न्युनिकरणको लागि प्रहरीले आफ्नो शैली पनि परिवर्तन गर्न जरुरी रहेको सांसाद यादवको भनाई थियो ।
वर्तमान परिस्थितिमा लोकतन्त्र र गणतन्त्रमाथी नै खतरा रहेको संकेत भईरहेको अवस्थामा हिंसा न्यूनिकरणको लागी सामूहिक प्रयासको आवश्यकता रहेको औल्याए । उनले महिलामाथि हुने हिंसा न्युनिकरणको लागि प्रत्येक पालिकामा महिला सेल स्थापना गर्नु पर्ने कुरामा जोड दिएका थिए ।
प्रदेश सांसद ओमप्रकाश शर्माले जिल्ला प्रहरी कार्यालयमा रहेको थुनुवा कक्षको ् बिस्तार गर्नु पर्ने जरुरी रहेको बताए । उनले भने,‘‘ हाम्रो प्रहरी कार्यालयको एउटा थुनुवा कक्षमा १५ देखी २० जना राख्ने गरिन्छ । त्यसलाई म अत्याचार नै भन्छु । त्यही भएर यसतर्फ हामी सबैको ध्यान जान पनि जरुरी रहेको छ ।’’
कार्यक्रममा आफ्नो धारणा राख्ने क्रममा प्रदेश सांसद रमेश कुर्मीले पिडित सहायताको लागि आफ्नो एक महिना बराबरको तलब सहयोग गर्ने प्रतिबद्धता जनाएका थिए ।
कार्यक्रम मै वीरगंज महानगरपालिकाका मेयर विजय कुमार सरावगीले विडित सहायताको लागि महानगरको तर्फबाट रु ५ लाखको चेक पर्सा प्रहरी प्रमुख प्रहरी उपरिक्षक गंगा पन्तलाई हस्तानान्तरण गरेका थिए ।
यस्तै पिडित सहायताको लागि पर्साको विभिन्न पालिकाहरुले पनि सहयोग गर्ने प्रतिबद्धता जनाएका छन् ।
पर्साका प्रमुख जिल्ला अधिकारी आसमान तामाङ्गको अध्यक्षतामा भएको कार्यक्रममा प्रदेश सांसद, पालिका प्रमुख, उप–प्रमुख, पत्रकार लगायतको सहभागिता रहेको थियो ।
जिल्ला प्रहरी कार्यालय पर्साको आयोजना र वीरगंज लेडिज सर्कल–३ डेपूटि मेयर्स क्लब पर्साको सह–आयोजनामा भएको कार्यक्रमको सहजीकरण पोखरिया नगरपालिकाकी उप–प्रमुख सल्मा खातुमा गरेकी थिईन् ।
