वीरगंज । वीरगंज महानगरपालिका–१५ स्थित भिष्वामा रहेको फस्ट स्टेप प्रि–स्कुलमा शुक्रबार निःशूल्क दन्त स्वास्थ्य परीक्षण शिविर सम्पन्न भएको छ ।
रोट्र्याक्ट क्लब अफ वीरगंज मेट्रोपोलिस र स्माइल डेन्टल केयर एण्ड पोलिक्लिनिकको सहकार्यमा विद्यालयले बालबालिकाको मौलिक स्वास्थ्य सचेतना अभिवृद्धिका लागि शिविरको आयोजना गरेको हो ।
विद्यालयका निर्देशक विजय कुमार बलका अनुसार सानै उमेरदेखि नै विद्यार्थीहरूमा दाँतको सरसफाइ र हेरचाहको बानी बसाल्न शिविरको आयोजना गरिएको हो ।
शिविरमा सहभागी विद्यार्थी, शिक्षक र अभिभावकले स्माइल डेन्टल केयर एण्ड पोलिक्लिनिकमा थप उपचार गराउँदा २५ प्रतिशत छुटको व्यवस्था गरिएको बलले जानकारी दिए ।
शिविरमा दन्त चिकित्सक डा. आमिर आलम र डा. भावना कुमारी झाले विद्यालयका विद्यार्थीहरूको दाँत परीक्षण गरेका थिए । डा. झाले अभिभावकलाई समेत समावेश गरी दन्त स्वास्थ्यको महत्त्व, सरसफाइ विधि र सावधानीबारे जानकारी दिइन् ।
सानो उमेरमै गुलियो खानेकुरा बढी खाने भएकाले अभिभावकहरूले सचेत भई नियमित दन्त परीक्षण गराउनु जरुरी रहेको उनको भनाइ थियो ।
शिविरको संयोजन गरेकी विद्यालयकी शान्ता बलका अनुसार कार्यक्रमबाट विद्यार्थी, शिक्षक, अभिभावक तथा स्थानीय गरी करिब ५० जनाले सेवा लिएको क्लबका अध्यक्ष दिपु वर्णवालले जानकारी दिए ।
