वीरगंज । पर्सा जिल्लाको वीरगंजस्थित सिर्सिया नदीमा हाम फालेर बेपत्ता भएकी किशोरीको पहिचान खुलेको छ ।
आइतबार बिहान करिब ९ बजेतिर वीरगंजकाे रानीघाटस्थित पुलबाट हाम फालेकी किशोरी बाराको प्रसौनी गाउँपालिका वडा नम्बर २, खुटुवा निवासी १७ वर्षीय रमिता कुमारी दास रहेकाे प्रहरीले जनाएकाे छ ।
रमिताकाे आमालाई जिल्ला प्रहरी कार्यालयमा ल्याएर साेधपुछ भइरहेकाे जिल्ला प्रहरी कार्यालय पर्साका प्रवक्ता प्रहरी नायब उपरिक्षक (डिएसपी) दीपक भारतीले वताए । रमिताकाे आमा वाेल्न सक्ने अवस्थामा नरहेकाेले थप कुराहरु खुल्न नसकेकाे उनले वताए ।
प्रवक्ता भारतीका अनुसार, खोजी कार्यलाई थप प्रभावकारी बनाउन स्थानीय बासिन्दासँगको सहकार्यमा प्रहरीको प्रयास जारी छ । अविरल वर्षाको कारण बाढीको बहाव उच्च भएको हुँदा खोजी कार्यमा चुनौती उत्पन्न भएको छ ।
प्रहरीका अनुसार रमिता कुमारीले नदीमा हाम फालेपछि उनी बाढीको तेज बहावमा बेपत्ता भएकी छन् । अविरल वर्षाका कारण सिर्सिया नदीमा आएको बाढीले खोजी कार्यमा कठिनाइ थपेको छ । प्रहरी टोलीले घटनास्थलमा पुगेर खोजी कार्य जारी राखे पनि हालसम्म रमिता कुमारीको कुनै सुराक फेला परेको छैन ।
यसैबिच, घटना लगतै पर्सा प्रहरीका प्रमुख प्रहरी उपरीक्षक (एसपी) कुमोद ढुङ्गेल पनि घटनास्थलमा पुगेका थिए । उनले खोजी कार्यको निरीक्षण गर्दै उद्धार कार्यलाई तीव्र बनाउन निर्देशन दिएका हुन् । खोजी कार्यका लागि थप सुरक्षाकर्मी परिचालित गरिएको र आवश्यक अनुसन्धान भइरहेको प्रहरीले जनाएको छ ।